सिंधियत - पुठिते हटन्दड़ कदम* एस पी सर [मंघिरमलानी]

*सिंधियत - पुठिते हटन्दड़ कदम*
एस पी सर [मंघिरमलानी]
संक: डॉ लाल थदानी 8005529714

अजु भारत जे सिंधी समाज जी वड़ी चिंता आहे त सिंधियत तरकी जी राह जी जगह ते खातमे जी राह ते कदम वधाये रही आहे। केतिरा इहो सोचिन था सिंधी भाषा जो उपयोग घटिजण उहो सबब आहे जहिं करे सिंधियत जा कदम खातमे जी राह ते पिया आहिन पर हकीकत इहा आहे त सिंधियत जे कमज़ोर थियण सबब सिंधी भाषा जो उपयोग घटिजंदो थो वञे। 
सिंधियत आखिर आहे छा ? सिंधियत उहो आयनो आहे जहिं में सिंधी समाज पहिंजी सामाजिक हलत जा अकस डिसी सघे थो।  सिंधियत उहे वट आहिन जिन में सिंधी समाज पहिंजी कामियाबी या नाकामियाबी तोरे सघे थो। सिंधियत समाज में मौजूद उहा लचकेदारी आहे जेका काबिलियत खे मुनासिब मान वारी मंज़िल हासिल करण में राह रहबरी करे थी। सिंधियत सामाजिक कायदन खे स्थिर [कायम ऐं दायम ] रखण जी उहा भावना आहे जेका सामाजिक हलत खे सही राह ते रखी, सामाजिक एकता में वाधि आणे समाज खे तरकीयाफ्ता बणाए थी। 
हकीकत में लचकेदारी ऐं दायम कायम हुजण इहे बुनियाद आहिन जिन ते कहिं बि समाज जी कामियाबी जी इमारत ठहे थी। बदकिस्मती सां सिंधी समाज में लचकेदारी तोड़े स्थिरता जी अणाठ तरकी पयी करे थी नतीजे तोर सिंधियत खातमे जी राह ते पयी थी वधे। अचो त हाणे इहो समझण जी कोशिश कयूं त इन्हन बिन्ही जी अणाठ सिंधी समाज जी एकता ऐं सिंधियत जे वाधारे ते कहिड़ा ऐं कीयं असर किया आहिन। 
समाज जी लचकेदारी शख्सन खे मोको डिये थी त उहे पहिंजी क़ाबलियत ऐं सलाहियत जे आधार ते समाज में मान वारो ओहदो हासिल करे सघन। हाणे जे गुजिरियल सतर सालन जो विचार कजे त सिंधी सामाजिक संस्थाउन में ओहदो काबलियत जे आधार ते न पर विरसे में हासिल थियण जो सिलसिलो शुरू आहे। किन हंदन ते त खास करे सिंधी पंचायतुन में इहो फखुर सां चयो वेन्दो आहे त शुरुआत में मुहिंजो डाडो मुखी हुओ पोय वीह साल पिता साहिब जन हुआ ऐं उन्हन जे स्वर्गवास खां पोय गुजिरियल पंजन सालन खां वठी मां मुखी आहियां। इतिहास गवाह आहे त इहो विरसे में ओहदा मिलण कहिं बि समाज खे तरकीयाफ्ता कोन बणाए सघियो आहे। सिंधी कौम में त इन विरसे में ओहदो मिलण जो हिकु बियो असर बि नज़र आयो ऐं उहो हो क़ाबलियत जो नयीं सामाजिक संस्था बरपा करण। शायद इहा सिंधी कौम जी बदकिस्मती आहे जो गुजिरियल बिन ट्रिन डहाकन खां सामाजिक संस्था जी शुरुआत जो सबब काबिलियत न पर बिया सबब थी पिया आहिन। कहिं बि समाज में वधीक सामाजिक संस्थाउं समाज जी एकता जी बुनियाद खे डांवाडोल करण जो कमु कनि थियूं छु जो इन सबब सामाजिक सलाहियतुन जी विरहासत थिये थी। सिंधी समाज जी हालत में इहो असर वधीक चिट्रो नज़र अचे थो छो जो सिंधी समाज आदमशुमारी जे लिहाज़ खां त थोरायी में आहे ई पर गडोगडु भारत जे अलग अलग शहरन में अलग अलग पसगिरदायी वारे माहोल में बि रहे थो। 
सागे नमूने सिंधी समाज में सामाजिक रुतिबे, इज़त मान जो लागापो शख्स जी सामाजिक कमन वास्ते चाहत ऐं सलाहियत सां न पर पेसे सां जोड़े डिसण जे नज़रिये खे वड़े पैमाने ते सामाजिक मंज़ूरी मिलण जो सिलसिलो शुरू आहे। पेसो सामाजिक कमन जी कामियाबी वास्ते हिक ज़रूरत ज़रूर आहे पर इहो सलाहियत जी जगह वठी सघे इहो मुमकिन न आहे।
इन्हन सभनी जो गडियिल असर इहो आहे त सिंधी समाज मां आहिस्ते आहिस्ते ई सही पर सिलसिलेवार सामाजिकता घटिजी रही आहे नतीजे तोर न सिर्फ सिंधी समाज में एकता जी अणाठ थी नज़र अचे पर सिंधियत जे खातमे जी राह ते कदम रखण सबब सिंधी भाषा जो वज़ूद पिण खतरे में महसूस थिये थो। 
  
गांधीनगर कोल्हापुर
14 October 2018